“Ўзбекнефтгаз”: Бошқарув раиси бошчилигида “Кўкдумалоқ” конида табиий газ ва нефть қазиб чиқаришни ташкил этиш масаласи бўйича йиғилиш ўтказилди (Фото)

Бош саҳифа Русский

“Ўзбекнефтгаз” АЖ Бошқаруви раиси Меҳриддин Абдуллаев бошчилигидаги “Ишчи гуруҳ” Қашқадарё вилояти ҳудудида табиий газ ва нефть қазиб чиқарилиши ҳолатини ўрганмоқда.

Шунингдек, Бошқарув раиси бошчилигида “Кўкдумалоқ” конида Муборак ва Шўртан нефть ва газ қазиб олиш бошқарма бош мутахассислари, мажмуа ва кон бошлиқлари иштирокида табиий газ ва нефть қазиб олиш муҳокамасига бағишланган йиғилиш ўтказилди.

Ушбу йиғилишда жорий йилнинг ортда қолган даврида табиий газ ва нефть қазиб олиш кўрсаткичлари танқидий кўриб чиқилди.

Бошқарув раиси томонидан кунлик газ қазиб чиқариш ҳажмини 1 млн куб метрга ошириш бўйича барча зарурий чоралар кўриш ҳамда биринчи чоракда 4063,3 млн куб метр табиий газ қазиб чиқариш бўйича топшириқ берилди.

Ўз навбатида, бурғилашдан чиққан 4 та қудуқни ўз вақтида жиҳозланмагани кескин танқид қилинди.

Бундан ташқари, йиғилиш давомида конлардан қазиб олинаётган нефть, газ ва конденсат ҳажми камайишининг олдини олиш бўйича мажмуа ва кон бошлиқлари билан алоҳида конлар кесимида муҳокама ўтказилди.

Бошқарув раиси қазиб чиқариш ҳажмини ошириш, камайишнинг олдини олиш бўйича чоралар кўриш кераклигини, бунинг учун барча шароитлар яратиб берилганини таъкидлаб ўтди.

Қазиб чиқариш ҳажми камайишининг олдини олиш бўйича барча кон бошлиқлари, масъул мутасаддиларга тегишли кўрсатмалар берилди.

Жумладан, бурғилаш ишлари олиб борилаётган қудуқларнинг шлейф қувурларини қисқа вақт ичида тортиш ва қудуқларни ўз вақтида мукаммал таъмирдан чиқариш кераклиги бўйича вазифалар белгилаб берилди.

Йиғилишда бошқармалар олдига қўйилган нефть, газ ва конденсат қазиб олиш кўрсаткичларининг, ишлаб чиқилган чора-тадбирларнинг бажарилишини конлар кесимида, ҳар бир мажмуа ва кон бошлиқлари билан алоҳида гаплашган ҳолда, мавжуд муаммоларни ўрганиб, бартараф этиш бўйича керакли мутахассисларга кўрсатмалар берилди.

Йиғилиш сўнггида, табиий газ қазиб чиқарилишида мавжуд камчиликларга йўл қўйган масъул ходимлар, тегишли мутахассисларга нисбатан интизомий жазо чоралари кўрилиши ва лавозимидан олиш масаласи кўриб чиқилиши маълум қилинди.

“Ўзбекнефтгаз” АЖ Матбуот хизмати

#нефть#газ#энергия#скважин#инвестиция#добыча#углеводород#экономика#завод#нефтебаза#қудуқ#кон#иқтисод#аёқш

|web-sayt |facebook |instagram |telegram|vk.com|YouTube|twitter|